شروط التسجيل في منتديات الزعامة :

 1 / حيّاك الله عندنا ضيف عزيز وغالي .. وهذي الساعة المباركة اللي شرفتنا فيها ... وترانا في الزعامة ننبسط لين شفنا الواحد جاي يبي الفايده والوناسه .. يعني مانبي واحدن يبي يخرّب والا كل ماطق عود بحصاة قال ( وعدنا في الطَلِعه ) وراح وسجّل باسم ثاني وبدا يسحّب رجليه ويذبب كلام ماله داعي .

 2 / حريصين جداً في منتديات الزعامة أننا نطلع على كل صغيرة وكبيرة ونُلمّ بأكبر عدد من المُشاركات وندقق فيها .. لكن ( العين ماتعلى على الحاجب ) وبعض المرّات مانقدر نسيطر على الوضع .. وبذلك ترانا نُخلي مسؤوليتنا عن أي شي ماله داعي وكُل ماطُرِح إنما يُمثّل وجهة ورأي نظر الكاتب ( اللهم أني بلّغت اللهم فاشهد )

 3 / ممنوع منعاً باتّاً أحد يحط مقطع اغاني ( ورأصني ياقدع ) وبالنسبه للصور في قسم ( عدسة الكاميرا ) فالمُشرفين هِناك هم اللي يقيّمون الصوره من حيث تركها أو حذفها والتواصل يكون ( معهم فقط ) في طرح الرأي بشأن ذلك ، أما باقي الأقسام فالأمر ( على حسب ) إن كانها صورتن مخيسه وفيها قلّة حيا وخربطه فياويل وياسود ليل اللي حطّها وان كانها غير ذلك فالأمر يبتّ فيه ( ديوان المظالم ) وبودنا أن جميع الأعضاء في هالمنتدى أنهم يعرفون أن منتدى الزعامة ( منتدى وسطي ) بس من دون شطحات أو خربطه .. .. وترانا بنجيب لنا عامل بنقالي عشان يشيّك على كل شي واللي بيلقاه حاطن ذاك وذاك والا علمن مهوب زين بنخليه يجلده لييين يعضّ الخدّ .. أجل قاعدين لنا ساعه نحتسي وننبه وآخر شي يخالف الانظمه .. أها بس !

4 / ممنوع الكلام في الدين أو التعليقات اللي مهوب زينه أو الكلام في الثوابت والطوائف والرموز أو الكلام في المشايخ والعُلماء والتهكّم بهم .. والمنتدى تراه ( سُنيّ ) نمره واستماره .. وترى راعي المنتدى ماقد راح للقطيف إلا مرّه وحده عشان يشتري سمك .

 5 / للمشرفين والمشرفات الحق في نقل الموضوع أو تعديله أو صنفرته .. نظراً لحاجة التقسيمات المذكوره آنفاً .

 6 / قسم نلتقي لنرتقي مافتحناه عبث .. بس مانبي نشوف أحد يسب الحكومه أو يحشّ في المسؤولين ... فيه مساحة كبيرة ( للرأي والرأي الآخر ) بس ماتاصل للتوالي البعيده ثم نجيب العيد ! نبي كلامن صاحي من دون خربطه .. وترى ( زع زع ) يخاف ويذلّ اذا جا علمن مهوب زين ! ..

 7 / قسّمنا المنتدى إلى أقسام .. شيّ خاص بالهبال والوناسة وشي خاص بالحريم والأرامل والمُطلقات وشي خاص بالجوّالات وشي خاص بالاقتصاد وشي خاص << خلاص اسكت اسكت .. درينا .. المهم .. مانبي واحد يروح يكتب موضوع عن الكمبيوتر في القسم الترفيهي أو تجي وحده وتكتب مشكلتها مع المكياج التقليد في قسم منتدى الفوتوشوب .. مانبي كذا .. نبي ترتيب وشغل متكتك .. واللي بيخالف هالنقطه راح نعلّقه على باب المنتدى ونفشّله ثلاث شهور ونص !

 8 / الكلام اللي ماله داعي ( ماله داعي ) واللي نشوفه يعلّق أو يذب كلام مهوب زين على غيره يتحمّل مايجيه ويمكن ترى نجتمع عليه من أعضاء ومشرفين ونجلده .

9 / يجب التسجيل في المنتدى بأسماء مُناسبه .. ومانبي اسم فيه ( إخلال بالأدب ) أو ( مدري شسمه ذاك وذاك ) .

 10 / ممنوع تكرار الموضوع في أكثر من قسم .. قسم واحد يكفي .

 11 / اللي يلاحظ مُلاحظه على مُشرف أو عضو ممنوع أنه يشرشحه ويكتب عنه علناً في المنتدى .. فيه شي اسمه ( المشرف العام ) رح أشتك عنده وهو ياخذ حقّك .

 12 / التسجيل لأجل الإعلان عن منتدى ثاني أو لأجل مشروع تجاري .. ممنوع .. إلا إذا نسّق مع الإدارة وخذ تصريح بهالشي . ذيك الساعه يحط اعلان في كل مكان ولو يبي على جبهته .. فيستاهل .

 13 / اللي يستخدم الرسائل الخاصه في حركات مهوب زينه تراه بيندم وراح نشتكيه على كوندليزا رايس عشان توريه شغله .. وللعلم ترى عندنا دبابيس في المنتدى وياكثرهم كثراه .. يعلمون المشرف آية الله : زعيم العشق . قدس الله روحه .. بكل شي .. ياويل ويلاه من طاح في يدي !

 14 / ممنوع ثم ممنوع أن الواحد يسجّل معنا بالزعامة بإسم يحتوي على كلمة ( زعيم ) أو ( زعيمه ) .. أنا اللي اسمي بس زعيم ... ايه وبعد ممنوع احد يسجل باسم الزعامة او يحط لي اسم من كلمتين وحده من الكلمتين فيها الزعامة .. وترى اللي يخالف هالبند بالذات ترانا ماراح نشاوره .. بنقضبه الباب على طول

 15 / الناس اللي تحب ( النسخ واللصق ) .. ترى الشغل هذا مانحبه في ( منتديات الزعامة ) .. نحب الجميع يبدع ويكتب لو شي بسيط من عنده . * تنبيه : ترى عندنا ترقيات .. من عضو بقراطيسه إلى عضو متلطم ثم يترقى ويوصل مرتبة أنه يكون ( عضو رسمي ) ثم ( عضو شاد حيله ) ثم يصير ( عضو معزّب ) ثم يستاهل ( أنه يصير عُمدة الزعامة ) وأخيراً راح يعلّق مرتبة ( من شيوخ الزعامة ) ثم يحط لنا عزيمه في استراحه .. للرجاجيل مفاطيحن مباركه وللحريم بوفيه مفتوح وخمس صياني حلى .

 16 / نمنع منعاً باتاً البتاتن كتابة اكثر من موضوع في القسم الواحد لليوم الواحد . يعني اكتب موضوع واصبر لك فترة وارجع شيّك عليه ورد على العالم اللي ردّت عليك . وترى بانقرشع المواضيع اللي نشوفها مكرره لنفس الكاتب .

راعي الحلال : زعيم العشق

( قلب أحمر )